Oda ni Judas ken ni Judas

But you will exceed all of them. For you will sacrifice the man that clothes me.
                                                                                 –Jesus, The Gospel of Judas

Liput ti liput. Isakibotmo a saludsod: Siak
kadi daydiay? Agtartaray. Apay. Apay?
Maibalangat a siit.

Pirak. Tallopulo a pedaso. Kasukat ti binusbosmo a sao.
Ngem saan a pateg ti Biag dayta. Dayta ti kinapudno.
Ammona. Ammona dayta.
Sika ti Kaykayatna. Iti amin. Isu ti pudno.

Sika ti Pudno.

Mangliliput. Maipulipol a panaplit.
Kunak kenka: Saan ta inaramidmo laeng ti kas naituding.
Ti kas naipadto. Agek ti mangpaneknek. Sika ti napili.
Ti Napili. Mayabaga a krus.

Isu ti nangpili.
Kenka.

Apirasem ti tallopulo a rupa ni Cesar.
Para ken ni Cesar daytoy. Ngem siak,
para Kenka. Sika,
para kaniak.

Nagbabawika kadi? Kunak kenka: Ngem apay a koma
pagbabawyam? Dara nga agubo iti butiak a bakrang.
Apay koma nga imbitinmo ti biagmo
ket linettatmo ti angesmo? Lansa
a mangipalok, mangibalud.
Tinungpalmo laeng.

Nagtungpalka, agrag-oka. Pannalakan, pannalakan.

Liput ti liput.
Mangliliput. Bato a pakaidugmaman.
Nasken a matungpal. Sika
ti kinapudno. Ti Kinapudno. Ti gibus.

Ti Gibus. Ngem sika met laeng ti rugi.
Ti Rugi ti amin. Panagungar. Pannakatungpal.
Pakaisalakanan.

Ta sika ti panungpalan.

Pannalakan, pannalakan.

 

(naipablaak iti BANNAWAG, april 20, 2009)