Setiembre ti Kiraos

Aglanglangta latta uray sangkakammet
Laengen a kilabban ti matmatda
Iti malanglanganan a duyog. Urnongek

Dagiti murkat, saggaysaek a piduten
Dagiti naiwawa nga innapuy. Danumak
Ti kimmublang nga ittip, pamedped

Latta pay daytoy, kaludon ti asin
Bareng mapalukmegna pay lat’ pingping
Ti nataengan man wenno ubing.

Anusanta lattan a sepsepan ti sustansia
‘Ta barakubak a marunggi wenno
Kulot a paria. Makaammonton boksit

No dinan marunaw ti natangkenan
A bulong wenno natibker a kalatkat.
Setiembre pay laeng ket adayo pay

‘Tay tagtagiurayen nga aginaldo
Ti Disiembre wenno baro manen
A kari ti umay nga Enero. Tinawen

A pulagid ti uray sangaapuyan
A bussog, barbareng dinton pilpilaan
Ti pinorkilo nga ep-ep ti bisaleg.

Kabayatanna, inta pay la turposen
‘Toy Setiembre: pagsanguanta a duomen
Dagita itta a mapiliam dita tataepam,

Sayang met no inka itar-ap, dim’ ibelleng,
Urnongem pati dayta pegpeg, naimas
Met a lugawen, pedped iti agmalem.

Paglanglanganta pay lat’ dita dulang
‘Ta kilabban, Setiembre pay la’ng, awan daan
Nga innapuy iti duyog nga aglanglangan.

 

(naipablaak iti BANNAWAG, setiembre 8, 2008 nga issue)