AWIS TI HULIO

Sumaranta ti lagip kas i’tay isasanikar iti masay-up
a sayamusom ti alisuaso ti kattempla a kape a barako.
Wenno iti alingasaw ti kaggao nga innapuy.
Wenno iti ayamuom ti dinengdeng no kasta a panagluluto
iti malem. Uminakbay, umadiwara, sumken ken sumnek
kas idadateng iti Hulio ti bang-i ken sabeng ti tudo,
littugaw, dagudog, ken uray pay ‘tay nagtagibanglo
a pas-eng ken langsi ti masansan a tumabbiraw a bagyo.

Isu a dim’ kunkunaen a dim’ ammo ti awis ti makalagip.

Kasano koma ngamin, aya, a maiddepko pay ti darang
ken dadang ti ginaburam iti dapo a beggang iti dapogan?

Kunak kenka: awan sapri, awan tedted a makasebseb.

Darangidangan latta dagidi sinibbolta a papaya
a mula ti akimmula, nga inta idi limed a sinuksukaan.
Kasta met dagidi apaglabanag a sarguelas, lomboy
ken bugnay nga inta inyas-asin ken kinulkulog.

Kunam kadi nga uray malapgis iti kalendario
ti kada agtrenta’y uno a Hulio ket regkasenka
metten iti ulimek ti naidalingiding, malinlinay
nga innapuy a naikadkad iti dalikan?

Dimo kunaen: burasen ti allawig dagiti manggak a maraitlog
ket diak namnamaen ti maipaluom iti kuribot wenno garong.
Nga anusak laengen a siguden a sigaman dagiti linuom ti init.

Kunak kenka: diak almanan, uray ita, ti naluom.
Sinigudta idi  iti umuna a lawas ti tunggal Hulio
dagiti awan pay gunnotna a bunga. Gusgustom
idi ken gusgustok nga imbugbugguong. Kaykayatta
idi a paglanglangan ti nagangganus, naal-alsem.
Dim’ kayat ket ti makutkuton, kaykayatam ti agkatkatay.

Ti ammok, agtubtubbog latta met ti nakemmo a manglaglagip.

Nasken kadi pay nga innak ita binsaen amin nga idukit?
Ket wen, sibibiag pay daydi puon ti mansanita
a nagtubo iti kadaklan ti narba ken nagpanawan a balay.
Kasta la ubbing idi nga akimpasmok. Ulienta dagiti nalabbasit
a nagbabassit sata pagbingayan a saggaysaen nga imulsit.
Sata katkatawaan dagiti umassi-assibay a sitsitik
ta awanen nabagida a sagpipirit a sam-it.

Hulio ket adu pay dagiti tartarubong ti kamotig nga inta kalien.
Adda latta manen natangkenan a dippig a saba nga inta tebbaen.
Di maibus dagiti niog nga innak itinnag, buongen ken igaden.
Adda latta pay umanay a tagapulot, asukar lattan no isut’ nasken.

Addan iti lilidduokam ti gusod, addan iti barukongmo ti guyod.

 

(naipablaak iti BANNAWAG, julio 28, 2008 issue)