PANAGKALINTUDUAN ITI MAYO

"I summon you in the moist hour, I raise my song to you."
                   — Pablo Neruda, The Song of Despair

Ti nadam-eg a pakdaar ti umarikap a lulem
kadagiti ligsay a manglikig iti darang ti matuon
tapno apirasen ti agal-al-al nga angin
ti maganggango a malem: daytoy ti pakauna
a tudo ti imbatim ket nagbati a maudi a Mayo.
Umuna a sebseb iti beggang ti Abril.
Umuna a buggo iti namureng a kuyem
ti dita malipatan a saem ken alunapet.

Kumkumpet a lidem a kas kalitem ti kammuol.
Awisenka manen tapno itarayanta ti kanabsiit
ken dulluog ket ikamakamta a liklikan ti bayakabak.
Ngem marusepta latta iti panagkalintuduan
dagiti tuwato ken sallapingaw. Kapilitan manen
ti isasar-ongta iti putong nga abong-abong
iti bangkag. Kabutengta ti sapri, ti pilaw, ti dinakkel
ti alog. Awisenka manen tapno pamagaanta
dagiti pumurpuraw a ramay ken bibig. Sumlep
a naulimek a lagip, kas kaliday ti managgaysan
a tedted iti nakutoran a sagumaymay.

Kunam idi: agmalem laeng ti kaem ti isemko.
Kunak met: agpatpatnag ti alsem ti essemko.
Kunam ita: din itden ti Mayo ti umuna a tudo.
Kunak met: mabigatan latta a sibabasa ti awisko.

Urnongek dagiti unnoyko, diak masbaalan, kasda
la puriket a dimket iti gayadan ti pantalonko.
Ayabannaka ti maulit-ulit a dueto ‘di malemta
iti bangkag, kas ariwawa dagiti matuduan a tukak.
Diak sukatan ‘toy nadaripespes a pagan-anay:
‘Yanudkonto iti karayan inton itulokmo
nga agginnulgolta manen iti kannag
kalpasan ti pasiam ti itanemta a lasag.

 

(naipablaak iti BANNAWAG, mayo 19, 2008)