"Kalgawto manen, a dimo mapupuotan, ta Marso manen…"
                     — Constante C. Casabar, Umuna a Bukel

Dumtengka a kas iti isasangbay ti pakauna a dagaang.
Sumiplotka a tagilanga ti damo a panagduyaw dagiti bulong

Nga agadit’ uggot. Sumangpetka a kas sang-aw ti lap-ok
A di nadepdep ti immagibas la nga arbis: naanem-em a sirnaat

Ti pulsopulsot a bisibis ti ling-et ti agdardaras nga ulep.
Iyegmo ti namaga a salimuot a mangilanat iti nasiwal

A sardam. Naalunapet ti pul-oy ngem narusanger dagiti sulbod.
Naulimek dagiti ungkay nga agganggango a sililimed.

Makitanto lattan ti kinapudno inton din makalibak ti sabong.
Inton agsuek lattan dagiti rusing ket agregreg lattan dagiti busel.

Agkitakit a rumkuas dagiti maitukit a bukel. Uray agikari
Iti linnaaw ti agwasangwasang a parbangon nga aginudo

Iti bannawag. Ngem di ketdi maibusan iti pammati ti kaddog
A ramut. Di met ketdi maadasan iti sisipenna a tubbog

Ti dam-eg. Kumraang man amin uray angin ket bungonen
Ti nakersang a tapok ti palayupoy ti rimmagangirang a bigat,

Tumadogka latta a kas agsapa a murmurmurayan ti tarabit
Dagiti mariing a mangngabiti. Ibuangmo latta dagiti nasigkatan

A tawa. Sagrapen ti siled, ti kadaklan, ti parangkap a bara.
Taraknen ti dadangmo ti nabatbati a bin-i, ti nailangi a namnama.

 

(naipablaak iti BANNAWAG, Marso 10, 2008 a bilang)