mannurat.com

wen, antigo dayta a pader, dagita a ladrilio a tinubuanen ti ruot ken agduduma a mula. dayta man baro a ladawan ti header ‘toy panablaagak ti kunkunak. panawenna met ngatan a masuktan daydiay nabayagen a familiar la unayen a retrato ti uggot ti santol a header image. sinuktak man para iti barbaro a look. bareng masuktakto pay ti theme wenno layout ‘toy interamente a blog.

alak dayta a ladawan manipud iti duog a pader ti simbaan katoliko ditoy ili ti iguig, cagayan. wen, daydiay simbaan iti tapaw ti turod a tumannawag iti karayan cagayan ken katantanapan. daytay ‘yan ti nalatak a calvary hills a ‘yan dagiti larger-than-life a replica wenno estatua a konkreto ti stations of the cross a daydaywen dagiti local ken international tourists aglalo no kastoy a panawen ti semana.

 

agasem a dagita a ladrilio, dagita a pila ket manipud pay idi ugma, idi panawen dagidi kastila ket dagita a ladrilio tinubay ti ling-et lua dara dagidi cailianes babaen ti polo wenno forced labor? ay, no imutektekam uray dagita la a duog a pader ti duog a simbaan, adda la ketdi mabukelmo nga estoria, no maysaka a mannurat, aglalo no agirayka iti historical fiction. nga isut’ padpadasek. addan ideak. diak la ammo no agmata. barbarengli, a.

 

suerte! wen, nakatiambaak iti suerte (suerte a tiamba, ania dayta?)! wen man ta idi naminsan nga aldaw a naidagasak iti national bookstore-tuguegarao (a masansan a pagup-uperak a pagbasaan kadagiti kursunadak a libro ken magasin; a kulanitak no kua ti bungonda a plastik tapno maukag ken mapalabsak a basaen ida, hehe!), panawen man gayamen ti sale kada discountda. adu ti napipintas a lako a libro a 40%, 50% ken uray 65% ti makissay iti sigud a presioda.

ket appow, daytoy man dagiti nasukalak:

wen, fragile things a collection ti short stories ken sumagmamano a daniw ni neil gaiman. no need nga iyintroduceko ditoy ni gaiman. maysa kadagiti makunkuna a "rock star" ita iti graphic novels, fantasy, sf, ken spec fic. simmikat iti kasta unay gapu iti nailadawan (comics, graphic novel kunada pay) a seriesna a sandman ken kadagiti novela a kas iti american gods, anansi boys, coraline kdpy. dayta coraline ti immuna a nagatangko a gaiman. kunkunada a "one of the most frightening books ever written" dayta coraline. wen, kunak man. ngem ti maysa a "nasursurok" dita coraline ket ti panagluto iti cheese omelette. ‘tay ngay nasigsigit a keso nga igisarmo iti butter samo laokan iti nabatir nga itlog. nagimas, papa, kunkuna man dagiti annakko ta isuda ti agkidkiddaw no kua a lutuek dayta a kita ti omelete a lutlutuen met daydiay butones-ti-matana a "maikadua nga ina" ni coraline iti lubong wenno dimension a nakaipanan wenno nakapananna.

ngem naitawtaw sa met ti saritaanen.

ket wen, addan nga agpayso iti sale wenno bargain books ti nbs daytoy fragile things ni gaiman. agasem, idi napan a tawen a damo a makitak a maidispley dayta a hardcover a libro, nupay napalalo ti ayatko a manggatang koma, diak nabaelan, piman, ta 1,129 a pisos ti presiona! no nagpuskol met ngamin sa hardcover pay. inar-arapaapko lattan no kaanonto nga adda maisalikadko a gatad a kasta tapno magatangko dayta a ribu-a-pisos-ti-pategna a libro. isu a napalalo ti ragsakko idi nakitak a 282 a pisos ken binting laengen ti presiona. inkidemkon a ginatang, piman, uray taginginaek pay la koma dayta 282 a pisos (kirmet! hehe!). agumaak ita nga agbasa ken agadal iti spec fic gaiman-style.

maysa pay a bargain books a naalak dayta the passion ni jeanette wintersoon. sigud a 435 a pisos, 108 a pisos la itan. ti pagsayaatanna pay ta inusarko daytay "laking national" cardko a nakaurnong gayamen iti nasurok a sangagasut a pisos ket isu ti imbayadko. magustuak ti prosa ken lengguahe ti novela. naindaniwan ken nabudian iti magic ken magic realism iti estilo ni gabriel garcia marquez.

idi sangalawas, naawatko manen iti 2go courier service dagitoy a libro manipud ken ni kabsat ferdie abuan ti san fernando, la union:

liberty ni stephen coonts, scimitar sl-2 ni patrick robinson, ken dark paradise ni tami hoag. nainayon manen kadagiti adun a pangted a babasaen. agyamanak unay, kabsat a ferdie! 

 

"Kalgawto manen, a dimo mapupuotan, ta Marso manen…"
                     — Constante C. Casabar, Umuna a Bukel

Dumtengka a kas iti isasangbay ti pakauna a dagaang.
Sumiplotka a tagilanga ti damo a panagduyaw dagiti bulong

Nga agadit’ uggot. Sumangpetka a kas sang-aw ti lap-ok
A di nadepdep ti immagibas la nga arbis: naanem-em a sirnaat

Ti pulsopulsot a bisibis ti ling-et ti agdardaras nga ulep.
Iyegmo ti namaga a salimuot a mangilanat iti nasiwal

A sardam. Naalunapet ti pul-oy ngem narusanger dagiti sulbod.
Naulimek dagiti ungkay nga agganggango a sililimed.

Makitanto lattan ti kinapudno inton din makalibak ti sabong.
Inton agsuek lattan dagiti rusing ket agregreg lattan dagiti busel.

Agkitakit a rumkuas dagiti maitukit a bukel. Uray agikari
Iti linnaaw ti agwasangwasang a parbangon nga aginudo

Iti bannawag. Ngem di ketdi maibusan iti pammati ti kaddog
A ramut. Di met ketdi maadasan iti sisipenna a tubbog

Ti dam-eg. Kumraang man amin uray angin ket bungonen
Ti nakersang a tapok ti palayupoy ti rimmagangirang a bigat,

Tumadogka latta a kas agsapa a murmurmurayan ti tarabit
Dagiti mariing a mangngabiti. Ibuangmo latta dagiti nasigkatan

A tawa. Sagrapen ti siled, ti kadaklan, ti parangkap a bara.
Taraknen ti dadangmo ti nabatbati a bin-i, ti nailangi a namnama.

 

(naipablaak iti BANNAWAG, Marso 10, 2008 a bilang)