kamaudiananna.

wen, at last, sa wakas, addan ‘tay padpadaanantayo a website ti palanca!

padpadaanan, kunak man, ta nabayagen a a mailanlanad iti daytay pilpil-apantayo (a mannakisalip iti palanca) nga authorization form nga intay’ pay ipampanotario iti abogado a pangisapataantayo a bukodtay’ a putar ti sinurat nga isaliptayo, ken ti panangipalubostayo iti "publication/presentation/re-publication and/or dissemination of all winning entries as provided therein in any manner or form, including through the Internet."

wen, babaen kano ti internet. kayatna a sawen, "make the work/s available for downloading on the Internet."

ket natungpal daytan iti kaaddan ti website ti palanca awards, piman!

palanca site

sinampolak ngaruden, a, ti nagdownload kadagitoy nga available a winning pieces. nagsayaaten, saanen a masapul a mapmapanak pay idiay makati tapno innak agipaseroks kadagiti obra a kursunadak (hmm, adun, a metten ti napaspaseroksko a sarita ken daniw, iti tagalog ken english; ket adu metten ti nagastok iti pagpaspaseroks, piman!) addayta, daytoy la agidownloaden, uray alaem aminen no kayatmo, amin a manuskrito.

nupay kasta, ti pay la available agingga kadagitoy a kanito ket dagiti winners idi 2006. inan-anusak, a, ti nagdownload. ket ti maysa a pagsayaatanna daytoy, ti adda a maala ket natural dagitay orihinal a manuskrito kas insumite nga entry dagiti nakisalip. isu dagitoy dagiti manuskrito a nayawat kadagiti hurado. in fact, dagita met a talaga ti masarakan iti pagilebbenan ti palanca foundation sadiay makati. orihinal, ket kayatna a sawen, unedited, a, ania pay. ditamon a makita wenno mabasa ti orihinal a panangisurat ken panangisagana ti mannurat iti entryna. dakkel ti pagdumaanda, ania pay, iti daytay mabasa a naipablaak. mabasa ken makitam amin ditan a typo errors, tipo ti lengguahe (language construction), gramar, ispeling ken dadduma pay nga orihinal a sagursor ti autor iti manuskritona (hell, pati rukod ti margin ti file ti manuskrito, mabalinmo a siripen no curiouska no nagtallugod met la ti mannurat iti rules iti margin). a maiduma no kua iti naediten wenno nakayasanen wenno nadalusanen a naipablaak.

nasayaat a pagadalan dagitoy nga orig a manuskrito. barbareng no maipanda amin a manuskrito ti amin a winners iti amin a tawen, manipud 1950 agingga iti kaudian (2007). ta ikarigatak a downloaden amin ida man, sal-at ketdi. sal-at, kunam man ta adu manen ti mainayon kadagiti pangted a babasaen.

ket wen, saan la a pagdownloadan iti winning entries dayta website. maala pay ditan dagiti masapsapul no makisalipka kas iti annuroten kada formulario (awan pay ketdi ti 2008 rules ken forms). ken mabalin (sa) payen nga ipatulod babaen kadayta a website dagiti entry. sa, kunak, a, ta iti pannakaipanpanablaag daytoy ket diak pay pinadas no mayaten ti pagisumitean (ta awan pay met entryk, piman, nga isumitek). ngem panagkitak ket mabalbalin san. padasenyo man ketdi no mabalinen.

ala, inkay nga`d sarungkaranen ti palanca website! good luck iti panagdownloadyo ken happy reading!