mannurat.com

mayulon sa met laengen ti agsurat.

malaksid iti inaldaw a panagikur-itko iti character sketches, short narratives, story plots ken one-liners ti posible a daniw iti 500-panid a record bookko, papaasukek met kadagitoy a panawen ti keyboard ti laptopko kadagiti isamsambotko a sursuraten. no ania dagitoy, diak ibagbaga pay. ngem ipostekto ida ditoy, nangruna daytoy maysa a pilpilitek nga iwakas sakbay nga agtapos daytoy a bulan: maysa a literary analysis.

ngem madanaganak ta no kua, ugalik a taktaken ti panagtanaktakko iti keyboard, ket daytoy ti obrak:

no inay-ayamkon dayta, agibus iti oras. ta diak sardengan agingga a diak makakompleto. sapay nagganas pay met daytoy solitaire iti windows vista, piman.

ipostek man manen daytoy patarusko idi iti "song of despair" ni pablo neruda. manipud iti nakalatlatak a koleksionna a "20 love poems and a song of despair." `bag la a pakatignayan manen iti panagputaran iti binbinnatog ken ververso.

Maysa a Kanta ti Pannakapaay

Agbukar ti lagipko kenka manipud iti rabii iti aglawlawko.
Itiptipon ti karayan ti nasukir nga unnoyna iti baybay.

Napanawan kas kadagiti ansisit iti parbangon.
Daytoyen ti oras ti isisina, oh napanawan!

Agtudtudo iti nalamiis a sabsabong iti pusok
Oh abut ti wara, narungsot a gukayab ti nalned.

Kenka nagpupunipon dagiti dangadang ken dagiti panaglibas.
Manipud kenka bumangon ti payak dagiti kumakanta a billit.

Amin-amin inalun-onmo, kas ti kawatiwat.
Kas ti baybay, kas iti panawen. Kenka amin-amin ket limned!

Daytoy ti narag-o nga oras ti iraraut ken ti agek.
Ti oras ti pannakakayaw a nangsilmut kas iti parola.

Aligagaw ti piloto, pungtot ti bulsek nga agmanmaneho,
nariribuk a pannakabartek iti ayat, kenka amin-amin ket limned!

Iti kinaubing ti angep ti kararuak, nagpayak ken sisusugat.
Nayaw-awan a mannuktal, kenka amin-amin ket limned!

Inkarataymo ti ladingit, kimpetka iti essem,
tiniltilnaka ti liday, kenka amin-amin ket limned!

Pinagsanudko ti pader ti anniniwan,
Iti las-ud ti kalikagum ken aramid, nagnaak latta.

Oh lasag, bukodko a lasag, babai nga inay-ayat ken napukawko,
Ayabanka iti nadam-eg nga oras, itag-ayko ti kantak kenka.

Kas iti burnay naglaonka iti awan inggana a kinaemma
Ket ti awan inggana a tagilipat binuraknaka a kasla burnay.

Adda ti nangisit a kinaagmaymaysa dagiti isla,
ket sadiay, babait’ ayat, innalanak dagita takiagmo.

Adda waw ken bisin, ket sika ti prutas.
Adda leddaang ken dadael, ket sika ti milagro.

Ah babai, diak ammo no kasano a maikutannak
iti daga ti kararuam, iti krus dagiti takiagmo!

Anian a nakaap-aprang ken nagababa ti essemko kenka!
Anian a nagrigat ken sibabartek, anian a nagirteng ken nagsaet.

Sementerio ti agek, adda pay laeng rugso kadagiti tanemmo,
agdardarang pay laeng dagiti nagbunga a muyong a tuktuktoken dagiti billit.

Oh ti nakagat a ngiwat, oh ti naungnguan nga im-ima-saksaka,
oh dagiti mabisinan a ngipen, oh dagiti nagkinnayetket a bagi.

Oh ti agmauyong a panagkanaig ti namnama ken bileg
a nagtinnipkelan ken nakapaayanta.

Ket ti panangipateg, nalag-an kas iti danum ken arina.
Ket ti balikas manmano a mangrugi kadagiti bibig.

Daytoy ti gasatko ket iti daytoy ti panagdaliasat ti pannakailak,
ket iti daytoy mapadso ti karayok, kenka amin-amin ket limned!

Oh abut ti wara, natnag amin-amin kenka,
ania a ladingit ti dimo impeksa, iti ania a ladingit a dika nalmes!

Iti kada tangguyob umaw-awagka pay laeng ken agkankanta.
Nakatakder a kas marino iti purua ti barko.

Agsabongka pay laeng kadagiti kanta, subaem pay laeng dagiti ayus.
Oh abut ti wara, nakanganga ken napait a bubon.

Lusiaw a bulsek a mammatok, daksanggasat a mammalsiit,
nayaw-awan a mannuktal, kenka amin-amin ket limned!

Daytoyen ti oras ti isisina, ti narikut ken nalamiis nga oras
nga iraked ti rabii kadagiti amin a pagorasan.

Ti kumarasakas a barikes ti baybay iparparautna ti aplaya.
Agsensennaay dagiti nalamiis a bituen, umak-akar dagiti nangisit a billit.

Napanawan a kas kadagiti pantalan iti parbangon.
Dagiti laengen di makaidna nga anniniwan ti agtirtiritir kadagiti imak.

Oh ad-adayo ngem iti amin-amin. Oh ad-adayo ngem iti amin-amin.

Daytoyen ti oras ti isisina. Oh napanawan!

sigurado, kaaduan kadagiti mannurat ita iti filipinas ken uray ngata dagiti addat’ abroad (a pinoy writers) ket makumikomda la unayen nga agisagsagana wenno mangpappapintasen kadagiti ilabanda kadagiti agdama a pasalip iti panagsuratan. iti man palanca, iti pasalip ti u.p., ncca, wenno kadagiti adu met a pasalip ita iti iloko. adda ngamin dagitay salip nga agdeadline iti agtapos daytoy a bulan.

kayatko koma met nga iraman ti bagik kadagita a makumikom a pinarsua. diak la ammo no adda maikamakamko, a.

kabayatanna pay, gapu ta addan sumagmamano a salip a naiserran wenno nadanonen ti ngudona ket kayatna a sawen ngarud a madaman a pilpilien ngata dagiti napusgan a hurado dagiti mangabak (ken maabak) a sinuratan. wenno adda pay ket ngata labitna a nalpasdan a napili dagiti winners. baka addan resultana a maammuan iti mabiit.

wen, adda ammok a maysa a pasalip, major a salip daytoy iti iloko, a nalpasen a napili ken naammuan dagiti winners. diak pay ibagbaga no apay nga ibagbagak ita daytoy. ngem kayatko la a rubroban ti gagar dagiti mannurat nga ilokano.

ket siguro, mabalin met ngatan no mangyarasaasak lang iti sumagmamano a hint. nupay diak mabalin nga ibaga ta siempre, intay’ lattan urayen ti ofisial a pakaammo manipud iti esponsor ti salip. patiek a mabiiten a maipakaammo daytoy.

ania a hint? adtoy: adda 7, wen, pito, a nangabak. adda taga-la union, adda taga-ilocos sur, taga-ciudad ti baguio, taga-pangasinan, taga-ilocos norte, adda pay taga-metro manila. sorry, awan ti taga-cagayan, vizcaya, isabela wenno quirino. agkapuykapuydan san dagiti kalugarak iti tanap. a pakairamanak metten, a, uwaaah!

kusto daytan a mapagpampanunotan. bisitaenyo ti dadapilan.com amangan ket ta adda di makatutor sadiay ket agibunannag iti ad-adu a clue.

kabayatanna pay, itoy a 2008, maysa kadagiti impramis wenno inkaritko iti bagik a sanguek man met ti agsurat. ‘tay kaaduek man met ti agsurat ita. adu a daniw, adu a sarita. kangrunaanna, ‘tay adda met koma adu a malpaskon. kangkangrunaanna pay, adda met koma mayaduk a masuraten a paset wenno paspaset ti novela.

isut’ gapuna ita a napanak man laengen gimmatang iti pagsuratak. no agsuratak kunak, talaga nga agsuratak iti longhand using bolpen ken papel. awan ti computer pay lang. sakonto la yakaren iti computer no idalusko siguron, a. isu a gimmatangak iti daytay record book. saan ketdi a ‘tay dadakkel. ‘tay bassit lang a kasla ka-size ti regular nga spiral notebook (spiral nga? ‘tay adda springna kano, kunada). `tay 500 pages/leaves ti innalak. ket addayta, manipud idi enero 11, rinugiakon ti agikur-it iti uray ania la ditan a mapanunotko, malagipko, matagtagainepko, makitak, masiripko, mariknak, maangotko, maramanak, maaprosak ken aminen ditan. panggepko ti agisurat ditoy iti character sketches, abbaba wenno atiddog a paragraphs. kayatko a masteren ti characterization, ti description, ti narrative. ken adu a random fictive thoughts, ti la adda a dialogues ken dialoguing ti uray sinno ditan a karakter iti uray no dinno ditan a lugar iti uray no dinno ditan a panawen.

patiek a dakkel ti maitulongna kaniak daytoy. no makaaduakon, no daytay dandani wenno inton maungpotkon daytoy lima gasut a binulong, amangan ket no daytanto la agpiduten kadagiti parapo wenno narativo ditoy ket makabukelakton iti/kadagiti sarita. wenno uray novela no isu.

adtoy ti sampol a naikur-itko, ti entryk idi enero 14:

kasla arimukamok, daytoy a panagtangep, iwarakiwak ken iyaprosna ti naanat a bisibis kas naanem-em a paniram-os iti panagsinnabat ti sipnget ken lawag, ti bara ken lamiis, a pakaabakan nga in-inut ken siiinayad ti lawag nga agpuspusasaw a maib-ibus ken marunrunot, idinto a ti sagabasab sibabannayat a maikankanaw iti sumsumriam a damo a pannakaisawang ti pumalpallais a saligemgem.

over sa met unay. kasla metten agdandaniw, di kadi?

daytoy pay, enero 18 entry:

pinaltingna ti murdong ti durik. sinikilsikilnak iti babassit a tugkik ti kullayaw a mamagarigenggen iti amin a kaunggak, iti barukongko, iti rusokko, iti amin a lalaemko, iti luy-ongko. babassit a sidol ti sikaw a mamipikel kadagiti pungto ti amin a ramay ti imak ken sakak. kuy-osenna amin a sentido. puntingenna amin nga agar-aripapa a rikna. siluannaka a kas i’tay billit a tagikukuaen a rabsuten ti nagbatayanna a taay. singgapongennaka nga isuamin ken amin-amin kas i’tay mariput a nagadu a billittuleng a masalikapan iti nagaponanda a katanubongan wenno kabikalan wenno kaleddaan.

diak ammo no mayat dagita. ngem adda pay pannakaatur ken pannakakayasnanto no mabalinkonto nga usaren nga ibinggas kadagiti suratekto a fiksion.

sapay la koma ta saan la nga agbanag a literary masturbation wenno bin-ig a la wordplay daytoy a gannuat ket maaramatkonto a talaga dagitoy ti la adda a maikurkur-it.

I have measured out my life with coffee spoons
–T.S. Eliot

no manen, apirasek ti alipusposmo
iti daan a tapaktapak ti nakemko. amangan
ket no nayakar iti panangpagpagutko
iti ubanmo iti daan a lulonan ti baro a tawenko.
rukodenka kadi met la manen, baro, iti binulan
a pannakalapgis ti kalendario, wenno
iti tinawen a panagbilang kadagiti nabungbong a ramay?

agbunga latta dagiti mata.
masidir latta dagiti siping a saba.
mawingiwingan latta dagiti makaniawan a nagkiwing nga apro.
ket iti sangkataw-an a basol ti nailian nga utek ken ima,
iti panagalsem dagiti lebben a basi,
iti pannakaparkag dagiti daan a bubon
ken pannakakidkid dagiti garong
ken panagmaga dagiti pamguongan,
iti pananglungsot ti maymaysa a kamatis iti sangakuribot,
iti panagibbong dagiti mauk-ukopan nga itlog,
iti nagatel a pannakaabraw ti daludal ti aba,
iti bassit a lana ti masinglag a niog,
iti panagulaw ken panagbakbakuar dagiti babbalasang,
mapabasol latta dagiti ulila a siding iti abaga
wenno dagiti nayaw-awan a sallapiding iti luluaan
wenno dagiti ginggined kadagiti sardam ken parbangon
wenno dagiti managapet kada pattolay kada singkol kada suni;
mainap latta dagiti mangan-annong a baliti,
maatap latta dagiti marmarna ken di makitkita;
maitudo latta dagiti umarikiak a salaksak
wenno dagiti masagang a banias iti kalsada.
ket matulawan latta ti dayaw dagiti pudno a buaya.
ket makastigo latta dagiti ugaw, dagiti dudon, dagiti dangaw
wenno dagiti agbangabanga a tuwato wenno sallapingaw,
wenno dagiti di mangan-ano a wak ken nangisit a pusa.
ket mayatang latta ngarud dagiti adu nga arak, mamaen,
karrurayan, itlog, lapi, ikamen, dalem, kararag ken kankanen.

agin-innapungol dagiti panagem iti kasipngetan ti bumaro a tawen.
agkikinnarawa dagiti daan a tawen kadagiti sirok ti lamisaan.
agkinkinnudkod iti nagatel a bukot dagiti binulan ken linawas
ti naglabas a tawtawen: aggagatel, aggatel metten
ti mapaspasungadan a baro nga al-aldaw, rabrabii: adu pay
a lamisaan ti mapasirokan, adu pay ti mabendisionan
a nailian a mangisalakan. adu pay ti mapulotan iti lana
a nailian a mangikanawa. adu pay ti maordenan
a nailian a mangaskasaba iti pannakasubbot. adu
pay ti mabuniagan iti asin, mapanaganan iti sirok ti latok.

ngem ubananka latta bimmaroka man a tawen, rukodem
latta ti nailian a resolusion kadagiti naray-ab
a kalendario ti dimmaan a tawen.

(naipablaak iti BANNAWAG, enero 7, 2008 nga issue)