mannurat.com

kalkalpas ti eleksion.

ngem diak kayat ita ti agiburay iti paliiw wenno sentimiento maipapan iti daytoy arigna makadurmen nga aktibidad. nupay siempre, maysaak met a naayatan ken maay-ayatan kada adda eleksion lalo no national. isu a napanak met, a, nagbotos idi mayo 14, iti nakarehistruak a precinto idiay ciudad ti tuguegarao (idiay kunkunak itattan, a, ta saanakon a residensia iti tuguegarao, addakamin ditoy ili ti iguig [ngem sabalinton a saritaan daytoy]).

isu a sabali a pakasikoran wenno pakakumikoman ti saritaek ita. bay-am pay la daytoy el-eleksion (iti agdama, agaapa pay laeng dagiti animal a polpolitico iti provincia ti cagayan iti provincial canvassing idiay capitolio, ket agingga ita awan pay naiproklama a governador ti cagayan, although maabak san ni incumbent a governor edgar ramones lara, mangab-abak ni mayor ti alcala alvaro "bong" antonio).

hmm, isu a sabali a pakasikoran wenno pakakumikoman ti saritaek ita.

wenno ipabuyak, kunak koma.

daytoy, ipakitak ti/dagiti agdama a pakasikorak babaen ti panangipasiripko iti naynay a sangsanguek iti aldaw ken rabii:

 

pangtedko dagitoy a liblibro. kaaduan kadagitoy ti nagatangko iti saglalaka a presio iti the little professor ken national bookstore. dikay’ ngata mamati, sag-P65 laeng daytoy natiambaak a sale iti nbs, isu dagitoy hardcover a "the early stories" ni john updike (nasurok sa a 100 a saritana ti naurnong ditoy including the famous "A & P"), "pompeii" ni robert harris (nabasak iti news a madama a maipelpelicula daytoy a novela ni harris), ken daytoy "that old ace in the hole" ni annie proulx, ti akinsarita iti "brokeback mountain." P150 met daytoy collection ti sarita a "runaway" ni alice munro, a kunkunada a maysa a kalalaingan a fictionist wenno short story writer ita iti north america (taga-canada ’suna), ken P140 daytoy "inkheart" ni cornelia funke, a madama met laeng a maipelpelicula a fantasia a novela para ubbing. P150 pay dayta "coraline" ni neil gaiman, a nabasakon iti ebook ngem innalak a dagus daytoy ta baka adda makauna. naidumduma daytoy a sarita para ubbing, aglaok a horror fantasy, kasla moderno nga alice in wonderland. dayta met "the sea" ni john banville ket inkidemko ti presiona iti nbs ayatko la a mabasa ti nadarisay a panagprosprosa ni banville a nakapilian daytoy "the sea" a booker prize winner iti 2005 (daytoy ti pinilik a ginatang over ti "the inheritance of loss" ni kiran desai a kapangpangabakna iti booker prize 2006, isarunokto a gatangen manen no adda umanay a takuar). hmm, dadduma a titles dita: "supot ni hudas" ni rio alma, "banyaga: a song of war" ni charlson ong, "a la carte: food and fiction" (naipabnablaagko daytoy idin; diak pay nalpas a basaena min a saritana), "the literatures of the philippines" (textbook daytoy nga ar-aramaten dagiti kolehio iti subject a phil lit 101, ginatangko ta adda sursuratek nga analisis maipapan iti maisursuro a "philippine literatures" kano iti college, nangruna iti region 1 ken region 2), "florante at laura" a version wenno sukisok ni virgilio almario, ken daytoy libro ni florentino hornedo maipapan kadagiti daan a simbaan-catolico iti tanap ti cagayan:

adtoy pay, binaliwak ti ayosna tapno makita dagiti titulo dagiti libro:

 

sabali met a pangtedko pay daytoy, ‘tay analisis wenno bassit a critiqueko kas jurado iti salip ti daniw dagiti senior citizens ti judge joven f. costales literary awards (iblagkonto ti sibubukel nga analisis, padaanan):

dayta magazine a nakapandag iti keyboard ti daan a desktop computerko, yummy magazine, maysa a food magazine. aggatgatangak ti kakastoy a magazine a pagad-adawak no kua iti sumagmamano a recipe a lutlutuek para kadagiti annakko a mahilig kadagiti makitkitada a makmakan iti magazine wenno tv. adda recipe ita ditoy nga issue ti yang chow, ‘tay kinirog nga innapuy ti insik a sikat iti chowking, padasekto a lutuen, special request da sadiri, sirmata ken imnas. ne, adda met dita dagitay ayudantek a gamigamko a selpon (k750i) ken daan a pda (palm tungsten e):

 dagitoy met dagiti nabuyamin a dvd movies, nakasalansan dita a nangpandag iti maysa pay a pangted a libro, ‘tay "augustr 1914" ni aleksandr solzhenitsyn:

 

adda pay nayonna daytoy pannakigumilko ‘diay currimao…

adu pay, a. ngem adtoy man, mangipabuyaak la iti maysa a ladawan ita. ala daytoy manipud iti luganmi idi agawidkamin. nasarunomi daytoy a bus nga agpa-cagayan iti paset ti ili ti pasuquin (a dimmagasanmi a naggatangan iti asin, bawang, lasona, basi, sukat’ basi).

immanay man la a rayray-awmin (dakami iti lugan, kakaduak da appo tony & arthur urata, dr. jim domingo, atanud jobert pacnis, kdpy.) dagitoy nakasurat iti likud ti nasao a bus. sapay nabayag a nasarunomi ta manipud pasuquin aginggan idiay sta. praxedes.

 

very smart the bus, di kadi? we satisfy laugh and giggle reading the writes in the bus back! how funny we was!

ngem seriously, adu ti ginubuay daytoy a diskusion ken diskurso. adu ti napagsasaritaanmi maipapan iti grammar, usage, applications ti lengguahe, english man wenno iloko. isu a we satisfy so much to their service, we will tell to management. nyehehe! 

 

sumagmamano a paliiw iti naangay nga eleksion ti baro nga ofisiales ti gf iti kallabes a kombension idiay currimao:

1. kadagiti naimatangakon nga eleksion ti gf, daytoy ti maysa a, no di man isu ti, katalnaan, kaannayasan, kadalusan. awan adu a sao, awan adu a sinsinnao. awan apa, pinnabasol, awan adu a saludsod wenno reklamo a rimsua ita. ket awan met ti adu a kandidato/nagkandidato ketdi ita nga eleksion. anbilibabol!

2. ti la para presidente ti nagbalubal. ket duduada pay. dadduma a pagtakeman (kas koma para bise, secretario, business manager, auditor, pro), dagiti la nainominar wenno nagpainominar ti timmaray. awan kinalabanda iti puestoda. uray dagiti para direktor wenno kameng ti hunta direktiba, pitpito laeng ti nagpapili ket natural automatikda a nangabak. ta kurang pay ketdi, a, ti nagpapili a para direktor ta walo koma ngarud ti masapul. diak ammo no apay a saan sa a nadesidir daytoy ti nagpaay a comelec ta rebbengna a walo koma a direktor ti nabutosan.

3. awan sa ketdin unay interesado nga agofisial ngatan iti gumil filipinas? sigsigud ket mapagiinnagawan dagitoy a puesto. sigsigud, adu ti agkandidato. apay itan ta pati para direktor, kurang payen? nauma ngatan dagiti siguden a nauma wenno maum-uman iti nakaro a politika ken pinnolitika iti gumil filipinas? panagkitak ket kasla senial, kasla signos daytoy ti naulimek a protesta. naimbag ketdi ta adda pay, a, nagkandidato wenno nagpapili.

4. manen, naawisak nga agkandidato iti para direktor. ngem manen, i politely declined. naibagak metten dagiti rason no apay diak mabalin wenno diak pay la mabalin nga agofisial iti gf. bagida pay latta. addanto ngata panawenna, a, met. saan pay nga ita. nupay adu met dagiti kayatko wenno sirmatak a plano wenno projecto maipanggep iti gunglo dagiti mannurat nga ilokano ken iti literatura nga iloko, maaramidko pay met la ngata ti sumagmamano kadagitoy babaen ti bukod ken bukbukodko a panangigannuat wenno panangirusat, iti man ikub wenno ruar ti gumil filipinas.

5. ti ket imasna, idi maibasa dagiti balota, adda ketdin nagang-angaw sa a nangibutos iti naganko iti listaanda para direktor, hehehe! ne, ket no kimmandidatuak met koma ket adda met gayam bumutos, aya, kaniak.

6. sakbay ti eleksion gayam, naipresenta dagiti revision, mabalbaliwan wenno proposed amendments iti constitution and bylaws ti gf. kunak no addada major provisions wenno paset a maamendaran. awan met ketdi. sagbabassit la a kasla panangatur ti naaramid iti sumagmamano a texto ti sumagmamano nga alagaden iti panagkameng ken wen, manen, pannakabutos ti ofisiales. ibinsakto iti sumarsaruno a panablaag dagiti amended a paset, kas naiwaragawag ken naiparang iti kombension.

7. maipapan iti pannakabukel dagiti chapter ti gf, inanamaek a maamendaran wenno mainayon ti kaso dagiti virtual a grupo wenno gunglo dagiti mannurat nga ilokano a kas koma dagiti ilokano writer bloggers wenno dagiti mannurat nga ilokano iti web ken sabsabali pay a yuyeng a virtual. ngem awan sa a talaga ti lugarna ti kastoy a penomenon iti gumil filipinas. saanto latta ngarud a mabalin wenno mapalubosan a maaddaan iti gumil chapter iti cyberspace. wenno uray iti langit la koma, uray pay no mayang-angaw nga addan chapter ti gumil iti langit, ti GUMIL Langit, a nakaikamengan kano dagiti pimmusayen ken nagpalangit a mamannurat nga ilokano. seriously, it’s about time a sanguen daytoy ti liderato ti gumil filipinas. tapno di met a maud-udi, a. paseten ti biag ken culturatayo ti internet, ti web, ti blogs. apay nga itulok ti gf a paud-udi latta?

8. nayonakto pay. kabayatanna, adtoy ti sumagmamano a pics. manen, no need a makapsionan: