maysa man a kasla postscript a paliiw iti kalkalpas a nakem conference nga inangay da manong ariel agcaoili itay noviembre sadiay universidad ti hawaii iti manoa.
nakitak ti sumagmamano kadagiti papel a naibasa ken naadal iti komperensia.
immapalak la ngarud. napipintas man dagiti sukisok ken duktal kadagiti conference papers maipapan iti amianan, iti ilokano ken kinailokano.
maysa kadagiti inungpotko a binasa ti sukisok a "llokano Women and Ilokano Literature: Initial Attempts at a Literary History of Ilokano Women Writing in Ilokano" da appo estrella o. soria, romulo g. basuel, ken marcelino c. soria a nangilistaan ken nangibinsaanda iti nagan ken gapuanan ti agduduma a babbai a mamannurat iti "different eras in accord with the national history of the country: Spanish Period (prior to 1900), American Period (1900-946), after Philippine Independence (1947-1971) and Contemporary Period (1972-to date)."
napintas man a maammuan ti kaadda ken kaadu met ken ti akem ken ak-akmen dagiti babbai a mannurat nga ilokano. ken kasta metten a mataldiapan wenno mapalabsan ti adda met sinursurat ken sursuraten dagiti babbai a mannurat nga ilokano nga agsursurat iti iloko.
dagitoy man dagiti babbai a mamannurat a nadakamat iti papel:
Spanish Period: Leona Florentino.
American Period (1900–1946): Ursula Villanueva, Enriqueta De Peralta, Antonia Marcos Rubio.
Period Since Independence (1947–1971): Luz Flores Bello, Rosario F. Anicas, Salome A. Valledor, Nene Gabriel, Grace M. Parker, Aurora Z. Oliver, Angela Patron, Lina Flor, Paz Z. Vergara, Cresencia T. Robianes, Crispina Balderas, Crispina V. Martinez, Eresvita Cabatu, Irma Rimorin Rosales ,Maria C. Quigao.
Contemporary Period (1972–2006): Leticia F. Fariñas, Victoria O. Nuval (nunal ti nailanad iti papel), Ester Isberto, Hermelinda T. Lingbaoan, Amelia A. Venenciano, Emma Sol. Pasion, Cristina Agriam, Norma V. Saludares, Ma. Cristina Balantac, Lydia Casil, Elizabeth Madarang, Ruperta VR. Asuncion, Pacita Cabulera Saludes, Virginia G. Alejandro-Duldulao, Amancia Pugat-del Rosario, Aileen R. Rambaud, Estrella G. Corpuz, Djuna R. Alcantara, Roselle Garingan.
nagustuak met ti sukisok. isuna laeng ta naisamsambot sa wenno talaga nga "initial attempt" pay laeng daytoy ket saan pay la a final nga attempt a talaga.
medio nakiro ngamin ti kronolohikal a pannakaiparang ti dadduma a nagan. kas pagarigan, agin-innurot dagiti nakalista iti "period since independence" ken ti "contemporary period." iti bukodko a pammaliiw ken duktal, mainugot a mairaman iti immuna a ragup ni apo pacita saludes ta 1960s pay a nagrugi nga agsursurat ken agipabpablaak ni apo saludes iti gapuananna. uray ni daydi apo amelia a. venenciano (-viloria) ken ruperta ramos asuncion ket nangrugida iti 60s. kasta met ni apo onofrecia ibarra, rebbengna a nairaman a nailista iti grupo a post-independence (awan pay ketdi pay piman ti nadakamat a gapuanan ni dr. ibarra idinto a nangabak pay iti salip ti sarita nga intuyang ti bannawag idi 1969. nadakamat ket ni apo ibarra kas maysa kadagiti "postwar Ilocano women writers continued writing or started writing again." ngem ti ammok, tuloytuloy ti panagsursurat ken panagipablaak ni dr. ibarra. adda pay ngarud linawas a "benneg dagiti ubbing" a sursuratenna iti bannawag idi 1980s.
ti maysa a kunaek a rituer wenno biddut ketdi ngata ti sukisok ket ti pannakairaman ti nagan ni ma. angelica andes kas "woman-novelist" iti contemporary period "who came out with two novels: No Adda Pay Kaimudingak Dita Pusom (If I Still Have A Bit of Importance in Your Heart) and Inton Awanen ti Bullalayaw (When the Rainbow is Gone), both published in Bannawag in 2000 and 2004, respectively."
masapul ti naan-anay ken nasiksiken pay a panagsukisok dagiti researchers. no aramidenda daytoy, maduktalanda la ketdi nga iti pudno a biag, awan ti novelista a babai nga ilokano nga agnagan iti "ma. angelica andes" agsipud ta parbo a nagan laeng daytoy ti maysa a lalaki a bangolan a mannurat nga ilokano. no asino, diak ibagbagan ditoy. iti bukodko a biang, idi mabasak ken basbasaek ti novela ni ms. andes, nabigbigko a dagus ti estilo ti mannurat a naglinged iti nagan ti babai. no managbasaka iti bannawag ken kabisadom ti sursuraten ken panagsurat dagiti mannurat a kanayon a makaipablaak ditoy, nalaka a maitugotam daytoy uray aglinged man iti pen name.
kabayatanna, adu dagiti importante a nagan ti babbai a mannurat nga ilokano ti saan a nairaman wenno nalibtawan ngata dagiti researchers. wenno nalabit dida naikamakam a nailista iti panangisamsambotda iti papelda.
adtoy man ti sumagmamano a nagan a di nairaman iti listaan (updated 26 dec. 2006):
Felicidad Unite
Eden Cachola-Bulong
Crescencia D. De la Rosa
Sinamar Robianes-Tabin
Feliciana J. Abril
Amelia V. Ramos
Lina Lorenzo-Sumaoang
Sonia B. Agarpo
Frances Bañes
Wilma Manzanillo
Chit Quintero
Cristina Gervacio-Gallato
Mary Ebitha Dy
Aida Campos Tiama
Josephine Iwatani
Fely Cristobal
Yolanda Ablang
Marlene Manzano
Teresita Tingonong
Carmencita Irona-Rodriguez
Evangeline P. Lopez
Myrna Molina-Tablizo
Cecilia Peta-Kuan
Judith Mercado
Estela Bisquera
Darline Gasmen
Leticia Lagda
Milli G. Nieva
Majelyn Monces
Amibell Corpuz
Judy Cajigal
Maelany Binbinon
Judianne Serrano-Soria
Arlane Manzano
Sherma Benosa
isapit iti del.icio.us
iraman iti digg
denggen
inayonmo ni Dr. Dy (nalipatak ti nagannan) a sigud nga opisial ti GF, lektiurer ti tinawen a GF Sem-Con… ken wen, no kayat pay a nayonan kadagiti scripwriters a kameng ti GF, addada amin dita agdama nga opisial ken kameng ti GUMIL Baguio Benguet…(basaen iti kamalig). wen, met ket, adda man ti “bileg ken sidapo dagiti babbai” a nasken koma met a mapreserba a kas maymaysa a babasaen… ken of course, saan koma met a liplipatan ni Maria Frez a Palanca Awardee… dagitay taga GLU ket aduda pay dita iti di nainaganan ken nabayagdan a mannurat…(a kas kada Miss Judith Mercado ken daydiay pay maysa a balasang a nangpidut ti pluma ti amana…(Ducusin or Gacusan?) ketdi, initial kunada met…mabalintayo a silpuan ken nayunan…para iti rekord, nasken a maadaw dagiti nagan dagiti amin a kameng dagiti probinsial tsapters tapno nalawlawa ti pagpidutan dagiti umiso nga itudo a mannurat… daydiay pay dean idi MMSU Batac ket awan pay ti nakitak a naganna…ket opisial ti GF dayta…. Well, napintas ti sukisok da Manong Celin and Manong Mulong…paglainganda dagitoy, sigud a kabaddungalak iti Saringit Magasin ken Saringit Chronicle ken Sirmata Magasin…
nakuna ni iddo idi 12/25/2006 @ 9:34 am
wen nga agpayso, mang jimmy, nalibtawak ni dr. mary ebitha dy. adu ti salaysay maipapan iti agrikultura nga impabpablaakna iti bannawag. hmm, diak pay ketdin nalagip nga inraman ni manang aida campos tiam gayam! diak pay ketdi nairaman ni apo ma. rosa atencio-cabie ken dagiti babbalasangna a da hermione ken mary ann. ken kasta metten nga agpayso ni apo maria frez felix a palanca awardee. ken adu pay. talaga nga adu pay. adu ti ammok pay ngem diak la ita malagip ti nagnaganda. (hmm, updateak man ti bukodko a listaan…)
nakuna ni Administrator idi 12/26/2006 @ 10:07 am
sapay ta dumdumngeg dagiti babbai a mannurat, addi. agpayso, no adda mangisakit kadagiti babbai a mannurat, umuna ken maudi dagiti babbai gapu ta adda kina-patriarkia ti Literatura Ilokana. paging the group of dr soria, mr soria, ken mr basuel. happy new year! patulodanka iti maysa a kopia, roy.
nakuna ni aurelio agcaoili idi 12/27/2006 @ 2:40 pm
NAGASAT A BARO A TAWENMO, ROY!! KASTA MET KADAKAYO AMIN, KAKABSAT!!
nakuna ni iddo idi 12/31/2006 @ 7:06 pm
iramanmo met a ni jane, gayyem roy; numona ta literatura met ngarud ti puon ken gapuna..hehe, ala narang-ay a baro a tawenyo amin a sangapamilia!
nakuna ni abril idi 1/2/2007 @ 9:15 pm
why did you ever leave out jane’s name, aver? abril, you are right! ngem ammotayon a ni RVA ket awan kenkuana ti self-importance–ken tay kinatangig nga adda iti kaaduan kadatayo.
nakuna ni aurelio agcaoili idi 1/6/2007 @ 11:34 am
nagasat a 2007 kadakay’ amin, appo!
gayyem abril ken mang ariel, agyamanak iti panangipalagipyo ken ni jane. dagitinton siguron sumaruno a researchers pay ti makammo nga agsukisok pay kadagiti di nailista a nagnagan. bareng iramandanto ni jane, hehehe!
gayyem abril, naawatmo ‘tay email re: libro ti gumil cagayan? emailannak koma no adda baro wenno sabali nga email addressmo, gayyem.
nakuna ni rva idi 1/8/2007 @ 11:15 am
wen, dumteng ti pannakalipat ti adda sibay ken abay, kadagiti kakastoy a situasion… kas kaniak, diay balasangko, ni Jenny, ket writer met, premiado a mannaniw (Sulquiano Awards, 3rd prize,)… isuna laeng ta hybrid iluko ti ammona, a ngumatuan ti kidayko no basaek kadagiti sinuratna…. agpadakami ken ni Pari Lito (Francia) iti parikut, uray ti balasangna, (diay nagdaniw iti “cellphone” iti Bannawag) ket hybrid met ti ilukona… dumtengto ngata ti panawen a rumimbaw ti hybrid iluko? jak a maisip no tama met lang, wenno tama ngata ta adda met panahon ti tunggal henerasyon? wenno tama kadi nga ikumpara ti sika ken isuda? hmmn… lunokem lattan tapno agrol ti lenguahe? hmmn…
nakuna ni iddo idi 1/15/2007 @ 4:54 pm
maragsakanak man ta nakitak nga nairaman ti nagan tay pagraraemek unay nga ni Prof Ruperta Asuncion kadagiti mabigbig nga babbai nga mannurat. istrikto kuna dagitay dadduma gapu ta kanayon nga adda ipa-assignmentna, ngem nalaing nga mangisuro. adda met dagitay panawen idi nga ellek kami nga ellek iti Comm II nga klasemi ta adda sense of humorna. adu ti masursuro kaniana.
nakuna ni jojogirl idi 1/17/2007 @ 4:05 pm
kabsat judianne, nalipatak pay ket gayam a nailista ti naganmo, pasensiakan. i-updateko ti listaak.
nakuna ni rva idi 1/23/2007 @ 11:31 pm
agyamanak kakabsat ta nalagipdak nupay saanak unay nga aktibo ita iti panagsuratan…God bless!
nakuna ni Cristina G. Gallato idi 2/14/2007 @ 12:03 pm
Mamanong ken Aapongko ida… agyamanak ta adda latta met ta naganko nga pasalsali uray no saanen a masango nga asaen daytoy plumatayo gapu iti adu nga pakakumikoman.
nakuna ni arlane idi 2/23/2007 @ 2:36 am
We are trying to locate the relatives of U.P. professor Robin Soria who passed away today. Thank you.
nakuna ni Babe Erese idi 7/10/2007 @ 6:52 pm