asidegen.

asidegen, kayatko a sawen ket ti panaglukat ti kaunaan a sanga ti national bookstore (nbs) ditoy tanap ti cagayan. wenno mabalin nga iti intero a northern luzon (no di iraman dagiti ciudad ti baguio ken vigan).

nagasat dagiti cagayano ta ditoy ciudad ti tuguegarao, iti brickstone mall and cinema ti napili a pakaipasdekan ti maysa pay a sanga ti nbs. nagasgasatak manen ta saanakon a masapul nga agpa-manila pay no kasta nga agpagusak unay nga ag-windowshop wenno gumatang kadagiti baro a libro. isu no kua ti ranrantaek idiay manila, wenno isu no kua ti pakaibusan ti adu nga orasko nga ag-malling (mapan iti mall) ti aguper kadagiti bookstores a kas iti nbs, powerbooks, filipino bookstore, goodwill, fullybooked, ken kadagiti booksale.

itan addan nbs ditoy mismo ciudad a pagnanaedan. addan pagpallailangan, pagpadaanan kadagiti baro a titulo, ken kangrunaanna, pagtubbogan ngiwat ken pakaisarsarakan manen no kua ti budget no adda kayat a gatangen a libro. kangrunaan a parikut ti igatang, hehehe! umanay lattan, a, a mapan bidingbidingen ken basabasaen dagiti blurbsna (wenno libasen nga ukisan ti bungonna a plastic tapno mapalabsan ti nagunegna, hehe!) no awan ti nairanta wenno makaanay a gatad a yala piman.

pagsayaatanna pay, adda manen mainayon a pangipaspasiaran kadagiti ubbingko. iruruamko ngamin iti liblibro, babasaen ken panagbasa dagiti annakko bareng matawidda met ti kina-booklover ken kina-bookworm datao. kanayonko ida nga ipasiar kadagiti pagtagilakuan ti libro ken naynay nga igatangak ida iti children’s books.

di pay ketdi naglukat daytoy nbs ditoy brickstone. ngem nalpasen a naaramid ti panakkelen a puesto (iti sigud a yan shakey’s ken puesto ti bench). itay simmiripak itay aldaw, madamada nga agikabkabil iti liblibro ken dadduma pay a tagilako kadagiti estante ken eskaparate.

nbs brickstone

mabalin nga itoy a lawas, aglukaten iti publico daytoy nbs. maysaakto ngata kadagiti kaunaan a customer. no addanto pirak, a, a maisalikad a paggatang iti makursunadaan a libro wenno aramat iti escuela ken ofisina.

kabayatanna, saan ketdi a ti nbs ti nakauna a nagipatakder iti makuna a bookstore ditoy tuguegarao.

nasurok san a dua a bulan, naluktan met ti sanga ti the little professor ditoy tuguegarao, iti maysa met laeng a mall–ti paseo reale, iti centro ti ciudad. ti magustuak ditoy a bookshop, adda met filipiniana section a pakailaklakuan dagiti titulo manipud iti ateneo de manila university press ken university of sto. tomas press. sa adu pay dagiti bargain a libro.

ditoy man laeng ti nakaalaak iti "salamanca" ni dean francis alfar. a nabayag a sinapsapulko kadagiti nagdadakkelan a bookstore idiay manila (kanayon nga out-of-stock iti fullybooked, ken saan kano nga impan ti ateneo press, pabliser ti "salamanca," iti nbs wenno powerbooks). nasarakak iti little professor, piman, daytoy palanca grand prize winner a novela ni alfar. nabayag a padpadaanak ken dadaanak a mabasa daytoy a novela ta daytoy ti kaunaan a palanca winner a novela a magic realist (imbes a social realist a kas kadagiti nangab-abaken a novnovela). nasurat iti impluensia ti magic realism da gabriel garcia marquez ken isabel allende. ni dean alfar ita ti kangrunaan ngamin a mangitantandudo iti speculative fiction wenno spec fic iti filipinas, babaen kadagiti sursuratenna a drama, sarita ken novela. saan la a magic realism ti spec fic, sapasapenna amin a science fiction, futuristic fiction, fantasy, horror kdpy. no agbasbasakayo wenno nakabasakayon kadagiti obra da neil gaiman, ursula le guin wenno dagiti hardcore sf writers a kas kadaydi isaac asimov, frank herbert, robert heinlein, arthur clarke wenno ni robert silverberg, paset amin ti spec fic dagitoy.

ngem itinto sabali a panablaagen a pagsaritaantay’ daytoy spec fic. ta padasentayto man met nga itudo wenno itugotan ti spec fic iti literatura iloko, no adda wenno addan.