mannurat.com

Mangyaw-awan

Agkarkaradap dagiti lua nga agpasurong iti ngudo
dagiti agkarauyos a sennaay. Kumkumlebka
a tulang iti katapokan, dimo kad’ mangngeg
ti araraw dagiti naalas-as a lasag a dumawdawat
                                        iti pammakawan?
                        Iti langalang, tumanaguob
nga al-aldaw dagiti aso a walang.

                Simpokka nga asuk ti anglem
iti nakusokuso a pakasaritaan dagiti naregreg a bagas
ken naparkagan a pagbagasan. Apay a dim’ man la mabugiaw
dagiti umay a tumuknot’ atang a mangkallong iti nabatbati
a diket itlog mamaen pinadis basi?
                        Iti let-ang, naynay
la a mapakpakigtotan ti salaksak, umarikiak, agkaragango
dagiti sanga nga inna madissuan.

                Diosenka,
Diosendaka dagiti gumagawwawa
a dakulap nga agpalpalama iti milagro ken ayat
iti gayadan dagiti
        sotana,
        barong,
        americana
                ken baag.

Ngem di met agparang dagiti matagtagiuray a partaan.
                        Di met dumteng
dagiti makarkararagan a mangisalakan.
Di met laengen sumangpet
                        ti mannubbot
                                 ti gasat.

Uray agkukuros a pananguros ken no mamin-ano
a panagwarsi iti benditado a ling-et, kas banios, di agsardeng
dagiti ordenado a ministro ti ulaw ken deklarado
a diputado ti ammangaw  
                a mangipalnaad
                iti orakulo
                                ti ngilaw.

Ayanmo kadi kadagiti sitio ken kanito a kasapulan
nga imdengam ti diskurso dagiti nabkangan a boksit?
Ayanmo iti mapa tapno koma pasiarem met ti arkipelago
                                a bingkol?

                        Denggem,
denggem ti kumpesar dagiti mapabpabasol
a kapsit. Danonem, danonem ti ili
dagiti babassit a sal-it.

kablaawak man ni ading a mannurat, naubing pay ngem bangolbangolanen, veteranon, premiado, master a mannurat/mannaniw, ariel sotelo tabag, kaka, atanud, kabsat, kadua a mannurat. isu ti baro a kameng ti bannawag magazine, mangrugi itoy octobre.

isu ni asseng. asseng: birngas nga imbuniag kenkuana ni atanud daniel nesperos. birngas nga inannugotna met ken impanaganna pay ketdi iti bukodna a blog. ammok no naggapgapuanna dayta a birngas nga "asseng." ngem diak ibagbagan ditoy. baka adda ikkanda iti gripo ti bakrangna babaen ti balisong, hehehe! (ngem "bestfriend" sa laeng met daydiay naggapuan ti balikas nga "asseng," awan danag).

hmm, agpa-canada ngamin ni manong prodie garcia padios, bannawag literary editor, isu a nabakante ti bannawag editorial (hmm, basaenyo laengen ti caption ti picture iti baba). ket ni ariel ti innalada. sapay ta uray addanton canada ni mang prodie, agsuratto latta kadagiti iloko masterpieces ket dina baybay-an nga iladuen ti niebe ti tinta ti plumana.

manen, makapalagip daytoy maipapan iti kaadda ti baro nga istaper ti bannawag. idi ngamin kanikapulo a tawen, nasurok payen, now, it can be told: dandaniak met naala nga istaper ti bannawag. adda idi agretiro a kameng. ket siak ti maysa a mapagpilpilian a maala nga staff. ngem saan a natuloy gapu kadagiti bambanag a di mapakpakadaan. no natuloy koma, baka addaak pay la ita met iti bannawag. addaak met la koma nga agnanaed ita iti metro manila, agraman familiak… a, ngem sabalin a saritaan daytoy. sabalinton a pananglaglagip.

kabayatanna…

Iti panagpakada ni Prodie Gar. Padios (nakatugaw) a Literary Editor ti BANNAWAG idi Set. 30, innala ti Manila Bulletin Publishing Corp. a baro a kameng ti magasin ni Ariel S. Tabag (maikadua iti kanawan) idinto nga agakem met ni Juan Al. Asuncion (kakanawanan) a Literary Editor. Kaduada iti ladawan ni Associate Editor Cles B. Rambaud (kakanigidan). Naala ti ladawan iti isasarungkar ni P.G. Padios iti opisina ti BANNAWAG idi Okt. 2 sakbay ti itatayab daytoy nga agpa-Canada idi Okt. 4 a kaduana ti pamiliana. Tubo ti Sta. Teresita, Cagayan ni A.S. Tabag, nagturpos a Cum Laude (AB Philosophy) iti Our Lady of the Angels Franciscan Seminary, Quezon City idi 1999. Mannurat met laeng iti BANNAWAG, nagisuro ni A.S. Tabag iti sekundaria iti St. Francis School, Manila, sa nagpaay nga editorial staff, sa idi agangay, kas managing editor ti Rimat Magazine. (ladawan ken kapsion manipud iti bannawag, octobre 23, 2006 nga issue)

gmm. gumil metro manila. gumil metro. daytoy ti gunglo dagiti mannurat nga ilokano iti metro manila ken kaparangetna a provprovincia. ket ne, adda metten website a pagpanablaaganda. daytoy man ti umuna a chapter ti gumil nga adda blogna. naunaanna pay ketdin ti mother chapterna a gumil filipinas, hehehe!

ni kamannurot/kammannurat jake f. ilac, rumungrungbo a premiado a mannurat ken maysa kadagiti aktibo a gumiliano bloggers, ti "brains" ken "hands" behind daytoy a weblog ti gmm.

makapalagip met daytoy. gmm. malagipko, adda met panawen a kamengak, nakitinnakunaynayak iti gmm. idi 1994 ken 1995, iti kaaddak iti manila (idiay ciudad ti marikina) iti panagpaayko idi iti integrated creative resources, inc.-writers cooperative wenno icri, maysa a kooperativa ken pablaakan dagiti mannurat nga ilokano nga idauluan idi ni manong ariel agcaoili, at the same time nagpaayak met kas secretario ti gmm iti babaen ni mang ariel kas presidente ti gunglo. ababa laenga panawen a panagtakem ketdi daydi ta naglusulosakon idi agawidakon iti nueva vizcaya ken cagayan idi 1996 (iti panagasawak). sakbayna pay ketdi dayta, naawatkami idi ken john b. buhay kas honorary members ti gunglo idi presidente ni apo honor blanco cabie. kanayonkam’ ngamin ken john nga agpa-manila idi iti ti la adda nga ipagpagnami ken iti daydi panagiliblibromi iti sagibo. kanayon a makaduami idi dagiti taga-gumil metro. isu nga idi kuan, inamponnakamin ni apo honor.

ala, ituloykonto ti manglaglagip… 

agsasamusam man ita ti parikut ken pakarikutan dagiti taga-up. itay nabiit, indeklara ti umuna a babai a presidente ti universidad ti singasing a pannakaingato ti matricula iti agarup 300% (wenno mapan a P1,000 agingga iti P1,800 iti kada unit). agasem dayta. kasanon dagitay "iskolar ng bayan?" a, ngem nabayag met ngaminen a nagbalin a kasla privado nga exclusibo a pagadalan daytoy universidad ti estado, saanen a para laeng kadagiti "poor" wenno mangurkuranges nga estudiante ngem ad-adu pay ket ngatan dagiti "babaknang" nga estudiante ditan, kas madlaw iti kaadu dagiti nakaparking no kua a nangingina a karro dagiti estudiante nga "iskolar ng bayan." imbes a mapanda iti ateneo wenno la salle ta kayang-kayada met ti bayad sadiay, up laengen. lugi dagitay nakurapay nga estudiante a deserving unay a tulongan ti govierno babaen ti nababa a matricula. itan, inginadan. ania pay ngarud ti servina nga state university? kurang kadi latta ti budget ti govierno para edukasion? para edukasion dagiti maikari a napanglaw nga estudiante?

agsasamusam. maysa pay daytoy problema ti philippine collegian, ti ofisial a pagiwarnak dagiti estudiante ti up. ip-ipiten ti administrasion ti up ti pondo ti collegian gapuna a di maipablaak dagiti isyu ti "kule." kueskuestionaren ti up admin ti autonomia ti publikasion dagiti estudiante. kayat ti up admin nga iggaman ken tenglen ti pondo ti publikasion. kayatda nga isuda ti makaammo iti pannakaimprenta ti "kule" kadagiti kayatda nga imprenta. amin dagitoy ket nabatad ken nalawag ken culpable unay a panagsalungasing ken panangilupit iti karbengan ken wayawaya ti prensa ken campus journalism. isu daytoy ti ilablaban ita dagiti taga-kule.

makapalagip. lagip iti adda met idi kina-tibak ‘toy numo idi maysaak pay laeng met nga estudiante iti maysa met nga state college idiay bicol. napasaranmi met idi iti campus newspapermi ti kas mapaspasaran ti "kule" maipapan iti pannakibibiang ti school administration iti man pondo wenno dagiti isursuratmi idi iti pagiwarnakmi. inlablabanmi met daytoy. kinasubangmi ti moderator nga appointed ti admin. kayat ti moderator nga agdalan amin kenkuana dagiti maipablaak. kayatna nge editen dagiti articulo a patienna nga anti-admin. dimi met impalubos. segun iti adda a linteg, technical assistance laeng ti rebbengna a pakasikoran ti maysa a campus publication moderator, korehirenna laeng grammar kas pagarigan dagiti articulo ngem dina rebbeng a pakibiangan ti ibagbaga dagiti articulo. susikmi dayta a nairaman iti sapasap a protesta dagiti estudiante para iti pannakapatapuak ti nakatugaw idi a presidente ti state college. inrupirmi met ti autonomia ti campus publication ket impablaakmi ti pagiwarnak nga awanan moderator. medio natibker met ti durimi idi, a. aktibokami a kameng ti college editor’s guild of the philippines (cegp) ken kaaduan kadakami nga staffer ti pagiwarnak ket kameng met laeng ti league of filipino students (lfs). now it can be told, maysaak met gayam, aya, a tibak idi estudianteak. ket wen, a, uray agingga kadagitoy, hehehe! isu a no makakitaak wenno makabasaak kadagitoy a paspasamak iti campus, makalagipak. ngem agpatingga met lattan iti lagip, piman. lagip-tibak. lagip-kinatibak. those were the days, kunkunak lattan. agarup amin met nga agtutubo ngamin, amin nga estudiante, agdalan kadagitoy a panawen ken proseso ken constructs. agduduma ketdi nga aktibismo ken kinaaktibista. tibak man as in active a talaga wenno tibak as in passive wenno di mangikaskaso, dedma, ‘ala lang. tibak a leftist, rightist, centrist, etc. para kaniak, i’m just glad nagdalanak iti maysa a kina-tibak a kapkapnekak nga agingga kadagitoy ket naynay a pakalagipak ken pakalaglagipak iti ad-adu nga adal ken sursuro nga amang a napatpateg ken nasamsamay ngem dagiti naadal ken nasursurok kadagiti colegio ken universidad.