Oda iti Agdama a Nababaian a Puseg

Berde ti uni ti di makaidna a dila.

Kumulaiseg ti tao iti mata.
Lemmesen ti paludipmo,
misuotmo, panagdilatmo,
a di makatutor dita naingpis
a patad a tanap ti rusok.

Sagradoka iti nakem.
Sagradoka latta uray saanka
itan a palimed.
Wenno aglemlemmeng
iti sakibot ti derrep.

Dikan sirsiripen ta dika metten agpaspasirip.
Timpuarka a didiosen ti masmasleg.
Immunegka a bag-en ti bisaleg.
Kimmutukot a taraken ti dardarepdep.

Berde ti angot ti di makatalna nga agong.

Paratignaynaka ti tignay para wayawaya.
Karbengam amin a karbengan
a rummuar ken agpakita.

Tapno madugsak ti pammati
a nangikaskasaba a mapukpukawka
kano iti nababaian a sitio ti rusok. (Awanan puseg,
awanan puseg, ala, ipakitam man?)

Tapno maipamatmat ti kinaaddam,
maipagtangsit, maipannakkel,
iti lulonan ti nasantuan
a wangawangan, pakatungpalan,
panungpalan. (Mano la a pulgadan
ti kaasidegna iti langit?)

Wayawayam amin a lamolamo a wayawaya.
Bilegmo amin a lamolamo a bileg.

Anitoka ti lukais.
Propetaka ti labus.
Mesiaska ti uksob.

Berde ti raman ti di makaanus a pus-ong.